“ IMUS ME ENU, CALA KOE LATANG AKU. REGES ME WETA, CALA KOE ATA KATU NAI’M ”

Ngo ngger le toe cai le’y, ngo ngger lau toe cai lau’y. Hitu kali pande di Nana Rinus pu’ung kat kakor’n lalong agu’n tiong hang leso. Tundu toe can tenang, kerok sa’in agu wan reges.... one nai koen nuk’n ga “Ole..cala latang aku koe imus’n meseng”.

 

Leso ho’o leso sabtu, hi Nana Rinus agu hae kos’n hi Nana Kador toe ngo kulia, ai ekstra tae de tuang setiap hari sabtu eta kampus. Toe ma cau’d buku’d, agu lego wa belpoin de ga. “Ole Lalong...cala pamot kin lite hi Enu ata pake baju ndereng meseng agu deko jeans lonto wa mbau haju eta kampus meseng ta”, nenggitu curup di Nana Rinus latang hi Nana Kador ata reme roco lewing’n kudut reok ute hang leso, tara benta Lalong Kador’n hi Nana lalong ho’o ga ali leng kador du SMA’n, ai SMA cama’s danong hi Nana Rinus agu hi Nana Kador, agu manga denge dere lalong kador di Kraeng Rensi Ambang, weli sua sebu liha muku, pika’d ga sesebu, untung sesebu taen, ruda kat benta lalong kador lise dengkir ho’on, bo ngasang tu’ung hi Nana Kador ho’oo ga hi Nana Pet. “Enu hot nia ta kesa”, segol di Nana Kador, “hi Enu ata pake baju ndereng agu deko belepoin meseng ta lalong”, wale di Nana Rinus, “ole mori, manik laing keta imus’n”, lanjut di Nana Rinus ho’o. “Bo nuk laku ise Enu ata lonto wa mbau haju meseng ta kesa hi Enu Kata ca, jurusan PGSD lau mai Cibal’n, hitu baju ndereng agu deko kimot laku ga toe ma pamot’n”, reweng di Nana Kador, “ai co’oy leng”, nenggitu kole reweng di Nana kador. “Kesa Lalong...telu ntaung aku eta STKIP ga, cepulu telu’d kole daku naca ata poli putus agu aku laku bilang de ga, toe ma cama imus de Enu hitu meseng, henang keta laku one nai, ole...ne mai keta beo ne ta, agu ceing keta ngasang’n”. Denge tombo hitu hi Nana Kador ga, wan reges, “Kesa Rinus...mai ga, com jumik leso de ga”, tae di Nana Kador, kali bao liha poli de reok ute londek labu ata teing de hae kos’d bo. 

Baca juga : Percakapan singkat lucu bahasa manggarai

Le ekstra leso sabtu, manga de tenang kudut ngo lejong mane sale kos de impal’n hi Nana Lalong mane ho’o, landing le wie munggu wie ho’o, manga de get one nai’n kudut ngo curup agu naca’n sale kos hi Nana Kador tong wie. “toe ngo ite ko kesa”, tae di Nana Kador, “toe ta Lalong”, wale di Nana Rinus, “ole..pata dite ye kesa”, segol di Nana Kador ho’o, “neka keta rabo ta Lalong, toe ma danga ger gaku kudut lako”, nenggitu wale wela toko wan hi Nana Rinus agu remeng denge dere di Kraeng Rensi Ambang, denge reweng hitu hi Nana Kador, tekar agu mburuk’n sale ne ga, ngo sale kos de naca’n awo mai Manggarai Timur. Tara toe ngo’n hi Nana Rinus ho’o ga, kaling hitu keta kin liha tenang agu get imus’n bo hi Enu baju ndereng eta kampus meseng. 

Sua jam ata poli’n, taung moleng arus batrei’n HP denge dere de Kraeng Rensi Ambang, kole moleng hi Nana Kador sale mai kos de naca’n, hitu keta kin wela toko wan hi Nana Rinus. “Ole kesa, ata co’op ite ge, cala nombong, cala beti le’as”, tae di Nana kador, holes racap wanang hi Nana Rinus ho ga, agu cau sa’in, wan curup “toe ta Lalong, toe ma beti gaku, ho keta kin tenang agu get’n laku hi Enu Baju ndereng meseng, cala bae koe lite ngasang ne ta, agu ne mai koe beo’n”, “hitu keta kin bo ko kesa, ole...hampa’n hi enu hitu ee, aram cama keta wuk di molas rueng’y, kiram kala keta liha hi molas pacar”, nenggitu reweng di Nana kador agu remeng na pe’ang songkok eta mai gala’n, “landing le imus’n kesa, henang keta one nai daku, eme latang aku keta imus’n kesa, tu’ung tae di kesa, kala molas pacar, le imus hitu’n kesa mbu-mbek keta daku nai”, nenggitu wale di Nana Rinus, wan imus...

Toe noing jam, toe noing’s manga ntala eta awang, toe noing kali wie ge tana lino. Neho  ntung runing tuka’n hi Nana Rinus, kedur ilur’n tenang hi Enu baju ndereng, kaling runing le darem tuka’n hi Nana Rinus. “Kesa”, benta di Nana Lalong Kador, “mai jumik wie de ga, latang hi Enu baju ndereng, cala bae li Enu Kata lau mai cibal tong, ai teman daku agu manga nomor HP’n one aku hi Enu Kata hitu”. Wencok’n hi Nana Rinus eta mai tempat tidur, len entap hi Nana Kador. “Kraeng Pet, eng koe ta”, tae di Nana Rinus agu remeng imus’n. Toe moleng wale di Nana Kador ho ga, tapi wan daler, daler le landing melet benta ngasang tu’ung hi Kraeng Kador li Nana rinus.

Poli gi hang wie dise cua, horos lime koe’n hi Nana Kador emi HP one mai cikang deko beruk’n, HP ata warna ndereng merek MITTO, HP eme setel lagu’y ncilor denge le golo lusang, HP Minyak Telon (MITTO) loer’n li Nana Rinus.  “Gereng kesa, aku kawe nomor di Enu Kata, aku sms hia cala bae liha hi Enu baju ndereng deko kimot hitu meseng”, tae di Nana Kador, “eng koe ta Lalong, kudut gelang bengkes’n koe nai daku ho’o”, wale di Nana Rinus. Nguti-ngatit ponggo lime’n hi Nana Kador ho kudut reweng agu hi Enu Kata one SMS. “Tabe wie weta geong, neka keta rabo aram laring sibuk, cala bae koe li weta, hi Enu ata pake baju ndereng ata remeng lonto cama agu ite wa mbau haju eta kampus meseng”, nenggitu katu reweng’n hi Nana Kador one SMS latang hi Enu Kata. “Gereng Kesa ga, gereng reweng di Enu Kata ite ga, ai poli lau’n laku katu reweng one SMS ga”, tae di Nana Kador, “delek keta hitu Nana Lalong ga”, wale di Nana Rinus agu reme mbu-mbek’n nai’n. Hitu kin lonto, hitu kin cau HP’n hi Nana Kador, ncilor kole HP MITTO ndereng diha, “ho’o gi Kesa, ho kole katu reweng’n hi Enu Kata ga”, nenggitu tae di Nana Kador, mekot’n hi Nana Rinus ruis hi Nana Kador, “Io Nana tabe wie, toe manga mengganggu’n, io Nana bae laku hi Enu hitu tae dite, hi Enu Lena ngasang’n, sale mai Lengor’n, hia ca kaeng agu aku, ho cupu mai aku hia”. Denge reweng di Enu Kata one SMS hi Nana Rinus ho ga, tamba keta mekot’n agu hi Nana Kador, “katu reweng kole lite ta Lalong, tae dite ga, Enu Kata, eme tu’ung kaeng agu ite’n hi Enu Lena hitu, agu dim hi Enu Lena ngasang’n, damang de tae lite cala toe di manga naca’n”, tae di Nana Rinus latang hi Nana Lalong. Toe rempe-rempe kole di Nana Lalong ho ga, lau’n katu reweng one SMS latang hi Enu Kata, agu tambang keta mbu-mbek nai’n hi Nana Rinus. Hitu kin kole lonto dise, ncilor’n kole HP MITTO ndereng di Nana Lalong, “De Nana, neka keta rabo” tae di Enu Kata, “hi Enu Lena ata manga naca’n ga, toe kole naca bon, hi Enu Lena ata manga hae kilo’n”, nenggitu kaut katu reweng’n hi Enu Lena sale mai lengor lut hi Enu Kata. “Campek lite mori...kaling ata imus bon, toe imus katu nai’n”, pasar di Nana Rinus, “kaling ata manga hae kilo’n”, segol di Nana Lalong, agu wan daler...

Toe laing leso minggu, toe ruda leso senin, kole-kole ngoeng’n hi Nana Rinus. Neka rodang imus’n hi Enu baju Ndereng, kaling imus latang hae kilo’n, neka rodang reges’n hi Enu Lena sale mai Lengor, kaling reges latang kaeng kilo’n.

“”HITU KANANG”” 

Penulis : dkraengiky522@gmail.com